Tweet
مليونية عرفات
تفريغ الحلقة التاسعة والأخيرة_ أدركوا اللحظة الفارقة
لــ د/ حازم شومان
الله أكبر الله أكبر الله أكبر،لا إله إلا الله،الله أكبر الله أكبر،ولله الحمد .
السلام عليكم ورحمة الله وبركاته وإحنا في أخطر ٤٨ ساعة فارفة في العشر الأوائل من ذي الحِجة يا جماعة،وإحنا في أخطر ٤٨ ساعة فارقة في حياتنا،يوم عرفة ويوم النحر.
داخلين علي يوم عرفة،يا تري مشاعرنا إيه وإحنا داخلين علي اليوم العظيم دا ؟
يا تري مشاعرنا إيه وإحنا بنُدرك هذه اللحظة الفارقة في حياتنا ؟
أول يوم عرفة في تاريخ البشرية كلها ربنا وصفه في سورة الأعراف،ربنا سبحانه وتعالى بيقول ::
" وَإِذْ أَخَذَ رَبُّكَ مِنْ بَنِي آدَمَ مِنْ ظُهُورِهِمْ ذُرِّيَّتَهُمْ وَأَشْهَدَهُمْ عَلَى أَنْفُسِهِمْ أَلَسْتُ بِرَبِّكُمْ " الأعراف 172، الله سبحانه وتعالى جمع البشرية كلها ليوم القيامة وأخذ عليها العهد والميثاق.
سألهم سؤال واحد ، أَلَسْتُ بِرَبِّكُمْ ؟
اللي هو السؤال اللي كل البشرية هتتسألوا تاني في القبر،من ربك ؟ " قَالُوا بَلَى شَهِدْنَا " الأعراف 172، البشرية كلها فِطرتها ١٠٠./. سليمة،نفس السؤال دا هيتسأل مرة تانية،شوفوا النُص التاني في الآية" أَنْ تَقُولُوا يَوْمَ الْقِيَامَةِ إِنَّا كُنَّا عَنْ هَذَا غَافِلِينَ " الأعراف 172،لما ربنا عز وجل هيجمع البشرية مرة تانية،ربنا عز وجل جمع الخلائق كلها مرتين بس،مرة يوم عرفة في أخذ الميثاق الأول في النُص الأول من الآية،ومرة يوم القيامة لما جمع البشرية والخلائق كلها،المرة الأولى سألهم سؤال والمرة التانية نفس السؤال،المرة الأولانية" أَلَسْتُ بِرَبِّكُمْ قَالُوا بَلَى شَهِدْنَا "،المرة التانية ٩٩٩ في الألف هيتقالهم من ربك ؟ هيقولوا ها ها لا أدري،يا تري انتِ ساعتها هتعملي إيه ؟
هتفضل فِطرتِك زي ما هي ،ولا فطرتِك الدنيا لوثتها ؟! والشهوات لوثتها ؟! والشبهات لوثتها ؟!
عشان كدا يا جماعة يوم عرفة هو يوم تجديد عهد مع الله عز وجل،هو اليوم اللي بنعمل فيه ريستارت للفطرة تاني ونرجع نجدد العهد مع الله عز وجل ونقوله اِنتَ ربنا يا رب، اِنت ربنا،ربنا الله سبحانه وتعالي.
يوم عرفة بيتحَسَب بالثانية يا جماعة،النبي عليه الصلاة والسلام قال إنه يوم بيكفر ذنوب سنة فاتت وذنوب سنة جاية،مفيش ولا عمل في الإسلام كله اتقال إنه بيكفر ذنوب سنة جاية غير يوم عرفة،تأمين على سنة لقدام،24شهر كاملين بيتغفر ذنوبهم بـ ١٢ ساعة صيام،يعني الساعة تغفر ذنوب ٦٠يوم يعني الدقيقة بتغفر ذنوب يوم كامل،حاجة جامدة قوي يا جماعة إن يوم عرفات ده يوم بالثانية في عبادة واحدة بس اللي هي عباده الصيام،أنا مش هقولكم عن يوم عرفة غير حديث واحد للنبي عليه الصلاة والسلام اللي يقدر يمسك قلبه يمسكه واللي عيونه هتغلبه ويفيض منها الدمع يسيب قلبه ويبكي علي قد ما يقدر،قال رسول الله صلي الله عليه وسلم : " مَا مِنْ يَوْمٍ أَكْثَرَ أَنْ يُعْتِقَ اللَّهُ فِيهِ عَبْدًا مِنَ النَّارِ مِنْ يَوْمِ عَرَفَةَ ، وَإِنَّهُ لَيَدْنُو ، ثُمَّ يُبَاهِي بِهِمُ الْمَلائِكَةَ " ، أَخْرَجَهُ مُسْلِمٌ مِنْ حَدِيثِ ابْنِ وَهْبٍ .
حتي أكتر من رمضان،أكتر من عِتق الرِقاب من النار في رمضان،يوم عرفة وإنه يتجلى،يتجلى دي مجتش في القران كله غير مرتين،مرة يوم عرفة ومرة في الجنة يوم الجمعة لما ربنا بيتجلى لأهل الجنة ويشوفوا ربنا ،والمرة اللي في القرآن لما ربنا تجلى للجبل ودا كان بردو في عشر ذي الحِجة ،لما كان موسى عليه السلام في الميقات في عشر ذي الحِجة مع الله سبحانه وتعالى،وإنه يتجلى،يا جماعة ربنا بيتنزل كل ليلة،وبيطَّلِع كل ليلة في الثلث الأخير من الليل،وبيطلع علي عباده كل ليلة النصف من شعبان كل سنة،وبيتجلى كل يوم عرفة،إيه الفرق بين الثلاث كلمات،يتنزل زي ولله المثل الأعلى أما حد ينزل ينقذ حد هيضيع،إنقاذ البشرية من الهلاك والذنوب،يطَّلِع دا رقابة،الله عز وجل بيراقب البشر عشان الله يرى مين اللي يستحق المغفرة ومن اللي لا يستحقها،إنما يتجلى دا معناها الله عز وجل سيُبهر الخَلْقَ بعطائه،زي يوم الجمعة كده في الجنة بقى لما ربنا يتجلى،سَمُّوه إيه ؟
يوم المزيد
يعني الله عز وجل يُبهر البشرية في الجنة بعطائه،اللفظ دا نفسه الرسول عليه الصلاة والسلام جابه مع ربنا سبحانه وتعالى في يوم عرفة.
يبقى يوم عرفة دا عطاءاته شكلها إيه ؟ ثم يُباهي بهم الملائكة فيقول ماذا أراد هؤلاء ؟
ربنا عز وجل يُباهي بينا الملائكة في اليوم دا،علشان كدا السلف مقدروش يصبروا على السنين اللي محجوش فيها ووقفوا علي عرفات فقالوا إحنا هننزل في المسجد نعتكف يوم عرفات في بلادنا كأننا حُجاج طب ليه ؟ مش قادرين نقاوم الثواب،مش قادرين نقاوم تجلي الله عز وجل ومباهات الله عز وجل،وعتق الله عز وجل للرِقاب من النار،وإجابة الدعاء،عشان كدا الصحابة والسلف كتير جدًا قالو إن يوم عرفة يعتكفوا زي ما أهل عرفة بيعتكفوا من الظهر للمغرب،والنبي صلى الله عليه وسلم فِضل رافع إيده من الظُهر للمغرب يدعي ربنا متواصل،هما كمان يعتكفوا في المساجد،سَمُّوها السلف التعريف بالأنصار،التعريف يعني تقليد أهل عرفة،هتعملي إيه بكرة في يوم عرفة ؟ وانتَ هتعمل إيه ؟ يوم عرفة يا جماعة فضله كله من الظُهر للمغرب هنعمل إيه ؟
هنعتكف في المساجد،نعرف الأنصار زي أصحاب النبي صلى الله عليه وسلم والسلف رحمهم الله.
طب هنعمل إيه ؟
التهليل كلمتكوا عن التكبير،وعن التسبيح وعن الحمد،وعن الحوقلة،وعن الاستغفار،بس لسه مكلمتكوش عن التهليل.
يعني إيه لا إله إلا الله ؟
مفيش غيره،ومليش غيره وحده،وحده دي سكينة بتدبح من القلب كل ما سوى الله عز وجل.
لا شريك له ::
مفيش ذرة في قلبي يارب بتسبح غيرك ولا بتهتف بذِكر غيرك.
له الملك وله الحمد ::
حصريًا كل شيء في الكون بتاعك انتَ بس يارب.
وهو على كل شيء قدير ::
مش دا أحب ذِكر لربنا يوم عرفة،يبقى لازم نعرف معناه ونعيش معناه.
توصيات يوم عرفة ::
لازم يوم عرفة ده يا جماعة نُص ساعة لا إله إلا الله وحده لا شريك له الملك وله الحمدالحمد وهو علي كل شئ قدير،وبعد كدا نُص ساعة دعاء،نُص ساعة تهليل،ونُص ساعة دعاء،نُص ساعة تهليل ونُص ساعة دعاء،لحد ما تغيب شمس عرفة لازم نجتهد في الدعاء،جهزي الدعاء من دلوقتي،جهِزْ أهم دعوات،عايز تدعي ربنا سبحانه وتعالي،هنكون صايمين،تفطير الصايمين يوم عرفة من أعظم أبوب الخير والفضل.
ربنا عز وجل يجعل هذا اليوم خير يوم مر علينا في حياتنا،ربنا يَمُنّ علينا بما مَنَّ به علي أهل عرفات،ربنا يجعله يوم عتق من النار لرقابنا،ربنا يجعله يوم تجلي علينا ببركاته ونفحاته،ربنا سبحانه وتعالى يرضى عنَّا في هذا اليوم،يارب اللهمَّ اجعله يوم رضىً ويوم عفو ويوم عِتق من النار ويوم مغفرة ويوم رِضوان ويوم فتح ويوم نصر ويوم مدد ويوم بركه وحفظٍ منك يارب،اللهمَّ ما أنزلته علي أهل عرفات من فتح وبركة فاجعل لنا منه أعظم حظ ونصيب،اللهمَّ آمين اللهمَّ آمين اللهمَّ آمين.
أدركوا اللحظة الفارقة،أدركوا يوم عرفة،أدركوا آخر ٤٨ ساعة في عشر ذي الحِجة اللي هما أخطر ٤٨ ساعة،خلاص عشر ذي الحِجة بيتفلت من إيدينا،والفَرَس في نهاية السَبق بيجيب آخره والعَدَّاء في نهاية السبق بيجيب آخره،عايزين نجيب آخرنا يا جماعة.
جزاكم الله خيرًا.
تفريغ الحلقة الخامسة
..ღ وَلَا تَنِيَا فِي ذِكْرِي ღ..
تفريغ الحلقة الثامنة
.ღ. سَبَقَ المُفَرِدُون .ღ.
لسماع السلسلة وتحميلها من
هنــا
تعليق